Riflessjoni adatta maż-żmien tas-sena


Riflessjoni

IR-RANDAN


Ir-Randan huwa żmien ta' riflessjoni, żmien li nagħtu aktar spazju għal Alla fil-ħajja tagħna.  Dan huwa żmien li fih nagħrfu jekk aħniex ngħixu sew jew le.  Dan huwa żmien li fih inħallu d-dawl ta' l-Ispirtu ta' Alla jdawwal ir-riflessjoni tagħna.  Dan huwa żmien li ngħidu mas-Salmista :

        "Ikollok ħniena minni O Alla fi tjubitek,
   fil-kobor tal-ħniena tiegħek ħassar ħtijieti."

Għax huwa Alla li jrid ikollu ħniena minna u jaccetta t-talba umli tagħna ta' ndiema.  Il-mixja matul dan ir-Randan trid tkun mixja fit-talb, fis-sawm u fl-ubbidjenza ta' dak kollu li l-Mulej Alla sa jħejji għalina.  Imma hemm bżonn li niftħu għajnejna, qlubna u ħajjitna.  Dan iż-żmien hu deciżiv għall-ħajjitna, għax fih irridu nagħrfu t-triq li jridna ngħaddu minnha Alla.  Jekk hemm bżonn, indawru r-rotta ta' ħajjitna lejha.  Dan irid ikun żmien ta' konverżjoni, ta' tiġdid, imma fuq kollox irridu nagħrfu f'liema stat tinsab ir-relazzjoni tagħna ma' Alla.  Għalhekk, dan huwa mument ta' grazzja kbira, għax il-Mulej sa jkollu ħniena minna.  Hu sa jħassar il-ħtijiet kollha tagħna.

Mela ejjew "incarrtu qlubna, mhux ilbiesna, u nagħmlu ħbieb ma' Alla."  F'dawn l-erbgħin jum irridu nuru x'insarrfu tassew fit-Talb, fis-Sawm u fil-Karita', għax dawn huma t-tlett armi li bihom irridu nikkumbattu l-ħażen li niltaqgħu miegħu.  Jekk ma nkunux b'saħħitna spiritwalment, incedu ma' kull tentazzjoni li jkollna.  Mela ejjew ħbieb, nimpenjaw ruhna bis-serjeta' biex f'dan ir-Randan kull meta jersaq ix-xitan lejna, inkunu nistgħu niġġieldulhu u nagħmlu kif għamel Ġesu', nirbħu żgur.

Godwin Vella Clark
Ministru Nazzjonali